తెలుగు రాష్ట్ర ప్రజలకు విజయదశమి శుభాకాంక్షలు తెలిపిన చంద్రబాబు

చెడుపై మంచి విజయానికి ప్రతీక విజయదశమి.. రాష్ట్రం సుభిక్షంగా ఉండాలని ఆకాంక్ష

 హైదరాబాద్ అక్టోబర్ 20 (పీపుల్స్ వాయిస్ )

అమరావతి: ఆంధ్రప్రదేశ్ ముఖ్యమంత్రి నారా చంద్రబాబు నాయుడు రాష్ట్ర ప్రజలకు విజయదశమి పర్వదిన శుభాకాంక్షలు తెలిపారు. చెడుపై మంచి, అధర్మంపై ధర్మం సాధించిన విజయానికి ప్రతీకగా విజయదశమి నిలుస్తుందని పేర్కొన్నారు. ఈ పర్వదినం ప్రతి ఒక్కరిలో నూతనోత్సాహాన్ని, ఆత్మవిశ్వాసాన్ని నింపాలని ఆకాంక్షించారు.

దసరా పండుగ ప్రజల జీవితాల్లో సుఖసంతోషాలు, శాంతి సౌభాగ్యాలు నింపాలని, ప్రతి కుటుంబం ఆయురారోగ్యాలతో వర్ధిల్లాలని కోరుకున్నారు. అమ్మవారి ఆశీస్సులతో ప్రజలందరికీ మంచి జరగాలని, చేపట్టిన ప్రతి కార్యంలో విజయం సాధించాలని ఆకాంక్షించారు.

ఆంధ్రప్రదేశ్ రాష్ట్రం అభివృద్ధి పథంలో మరింత ముందుకు సాగాలని, రైతులు, కార్మికులు, మహిళలు, యువతతో పాటు అన్ని వర్గాల ప్రజలకు మంచి భవిష్యత్తు లభించాలని కోరుకున్నారు. ప్రజల ఐక్యత, సామరస్యం రాష్ట్ర ప్రగతికి బలంగా నిలవాలని పేర్కొన్నారు.

విజయదశమి స్ఫూర్తితో ప్రజలంతా సానుకూల దృక్పథంతో ముందుకు సాగాలని, రాష్ట్ర అభివృద్ధిలో భాగస్వాములు కావాలని ఆకాంక్షించారు. కనకదుర్గమ్మ ఆశీస్సులతో ఆంధ్రప్రదేశ్ సుభిక్షంగా, సంతోషంగా వర్ధిల్లాలని ముఖ్యమంత్రి చంద్రబాబు నాయుడు శుభాకాంక్షలు తెలిపారు.