అమరవీరుల ఆశయ సాధనకు విద్యార్థి లోకం పునరంకితం కావాలి!_PDSU

అమరవీరుల ఆశయ సాధనకు విద్యార్థి లోకం పునరంకితం కావాలి!

నవంబర్ 5 నుంచి 11 వరకు విద్యార్థి అమరవీరుల వారోత్సవాలు

శాస్త్రీయ విద్య, సామాజిక న్యాయం కోసం ఉద్యమించాలి – PDSU పిలుపు

ఖమ్మం, నవంబర్ 2 (పీపుల్స్ వాయిస్):

విప్లవ విద్యార్థి అమరవీరులు జంపాల చంద్రశేఖర ప్రసాద్, శ్రీపాద శ్రీహరి 50వ అమరత్వ స్మృతిని పురస్కరించుకుని నవంబర్ 5 నుంచి 11 వరకు విద్యార్థి అమరవీరుల వారోత్సవాలు నిర్వహించనున్నట్లు PDSU తెలంగాణ రాష్ట్ర సహాయ కార్యదర్శులు గోకినపల్లి మస్తాన్, వంగూరి వెంకటేష్ తెలిపారు. అమరవీరుల త్యాగాలను స్మరించుకుంటూ, వారు ఆశించిన సామాజిక మార్పు కోసం నేటి విద్యార్థి లోకం పునరంకితం కావాలని పిలుపునిచ్చారు.స్థానిక సీపీఐ (ఎంఎల్) న్యూడెమోక్రసీ పార్టీ కార్యాలయంలో జరిగిన PDSU జిల్లా ముఖ్య నాయకుల సమావేశంలో వారు ముఖ్య అతిథులుగా పాల్గొని మాట్లాడారు. విద్యార్థి ఉద్యమ చరిత్రలో జంపాల చంద్రశేఖర ప్రసాద్, శ్రీపాద శ్రీహరి చేసిన త్యాగాలు నేటి తరానికి స్ఫూర్తిదాయకమని పేర్కొన్నారు. అన్యాయం, అసమానతలు, దోపిడీ, వివక్షకు వ్యతిరేకంగా విద్యార్థులు పోరాట స్ఫూర్తిని కొనసాగించాలని అన్నారు.డిజిటల్ యుగంలో విద్యార్థులు సాంకేతిక పరిజ్ఞానానికే పరిమితం కాకుండా సామాజిక స్పృహ, శాస్త్రీయ దృక్పథం, ప్రశ్నించే తత్వాన్ని పెంపొందించుకోవాలని సూచించారు. సోషల్ మీడియాలో వచ్చే సమాచారాన్ని గుడ్డిగా నమ్మకుండా వాస్తవాలను విశ్లేషించాలని, మూఢనమ్మకాలు, అశాస్త్రీయ భావాలు, మతోన్మాద ధోరణులను ప్రశ్నించాలని పిలుపునిచ్చారు.

విద్యారంగంలో ప్రైవేటీకరణ, కార్పొరేటీకరణ పెరుగుతున్న నేపథ్యంలో ప్రభుత్వ విద్యాసంస్థలను బలోపేతం చేయాలని, పేద విద్యార్థులకు నాణ్యమైన విద్య అందించాలని డిమాండ్ చేశారు. విద్యను వ్యాపార వస్తువుగా కాకుండా ప్రతి ఒక్కరికీ అందాల్సిన హక్కుగా పరిరక్షించేందుకు విద్యార్థులు సంఘటితంగా ఉద్యమించాలని అన్నారు.

ప్రత్యేక సమగ్ర ఓటరు జాబితా సవరణ (SIR) ప్రక్రియను రద్దు చేయాలని వారు డిమాండ్ చేశారు. ఓటు హక్కు రాజ్యాంగం కల్పించిన ప్రాథమిక ప్రజాస్వామిక హక్కు అని, ఓటర్ల జాబితా సవరణ పేరుతో అర్హులైన పౌరుల ఓటు హక్కుకు ఎలాంటి ఆటంకం కలగకూడదని పేర్కొన్నారు.కుల, మత, ప్రాంతీయ విభజనలకు వ్యతిరేకంగా విద్యార్థులు అప్రమత్తంగా ఉండాలని, లౌకికవాదం, ప్రజాస్వామ్యం, సమానత్వం, సౌభ్రాతృత్వం వంటి రాజ్యాంగ విలువలను కాపాడాలని కోరారు. నిరుద్యోగం, ఫీజుల భారం, ప్రభుత్వ విద్యాసంస్థల సమస్యలు, సామాజిక వివక్ష వంటి ప్రజా సమస్యలపై అధ్యయనం చేస్తూ పరిష్కారం కోసం ఉద్యమించాలని పిలుపునిచ్చారు.అమరవీరుల చిత్రపటాలకు నివాళులర్పించడమే కాకుండా, వారు ఆశించిన సమసమాజ నిర్మాణం కోసం కృషి చేయడమే నిజమైన నివాళి అని పేర్కొన్నారు. నవంబర్ 5 నుంచి 11 వరకు నిర్వహించే విద్యార్థి అమరవీరుల వారోత్సవాల్లో విద్యార్థులు, యువత, మేధావులు, ప్రజాస్వామికవాదులు పెద్ద సంఖ్యలో పాల్గొనాలని విజ్ఞప్తి చేశారు.ఈ సమావేశంలో PDSU జిల్లా ఉపాధ్యక్షులు ఈశ్వరి యశ్వంత్, శశికిరణ్, సహాయ కార్యదర్శులు వెంకటేష్, సాదిక్, రాము, కోశాధికారులు సురేష్, శ్రీకాంత్, విశ్వాంత్, చందు, సాగర్ తదితరులు పాల్గొన్నారు.

ఇది కూడా చదవండి :: తెలంగాణను కరువు రాష్ట్రంగా ప్రకటించాలి! : కూనంనేని